Kobi 40, por fiton Dallasi!

Kobi 40, por fiton Dallasi!

27 Janar Kobi Brajant vinte nga një periodë e tretë për t’u harruar, ku bëri vetëm një kosh. U ndal në mënyrë të ashpër në dy aksione radhazi dhe në të dytin mori dhe një faull personal në sulm. Perioda finale u hap me pasimin e gabuar të qendrës së Lejkërsave ndaj tij. Por më pas kjo mbrëmje e keqe u ndriçua, ai rigjeti formën më të mirë dhe Dallas Maveriksat për pak desh u shokuan nga rikuperimi i tij dhe i Lejkërsave. Brajant shënoi 16 pikë në periodën e katërt, përfshi këtu 10 pikët e fundit të Lejkërsave, por kjo nuk mjaftoi për të thyer Dallasin në shtëpi. Po, sepse megjithë 40 pikët e Brajantit, Mavsat i thyen Lejkërsat 112-105 të premten në mbrëmje për fitoren e 10-të në 12 ndeshjet e fundit. “Tentuam me të gjitha forcat tona të rikuperonim”, tha Brajant. “Por në fund nuk ia dolëm mbanë pasi kishim shumë punë për të bërë”. Dirk Novicki e Xhosh Hauard shënuan secili nga 26 pikë e 10 topa në tabelë për Dallasin, por ishte organizatori Devin Harris që shënoi pikët më vendimtare në periodën e katërt. “Lejkërsat tentuan të rikuperonin në periodën e fundit, por ne ruajtëm agresivitetin tonë, sepse ishim të përgatitur për diçka të tillë. Donim të fitonim me çdo kusht dhe ia dolëm mbanë”, tha Herris, që e përfundoi takimin me 18 pikë për Maveriksat.

Feniksi “dhunon” shtëpinë e LeBronit!

Shon Merion realizoi vetëm një kosh, por ishte pikërisht ai që i dha Feniksit fitoren 110-108 ndaj Klivlendit. Merion shënoi me një gjuajtje nga gjysëm distanca kur duheshin dhe 1"1 lojë dhe Sansat vazhduan serinë e tyre fantastike të fitoreve edhe në një fushë të vështirë si ajo e Kavsave, që pësuan vetëm humbjen e tretë në 14 ndeshjet e fundit. Razha Bell shënoi 27 pikë, Nesh 26, 21 prej të cilave me trepikësha, dhe Amare Staudemajër 22 teksa Sansat ruajtën rekordin më të mirë të Konferencës së Perëndimit. “Ishte një fitore shumë e madhe për ne”, tha organizatori Stiv Nesh. “Shumë faulla e topa në tabelë nuk ishin në anën tonë, por ne ruajtëm qetësinë deri në sekondat e fundit, duke bërë ndryshimin me mbrojtjen e sulmin”.